مسلم لیگ ن کا پارلیمانی اجلاس ,218ارکان کا مریم نواز پر مکمل اعتماد کا اظہار

جاتی عمرہ میں مریم نواز کی زیر صدارت پارلیمانی پارٹی کا اجلاس ہوا، جس میں نومنتخب اراکین پنجاب اسمبلی نے شرکت کی۔
ذرائع کے مطابق اجلاس میں لیگی اراکین سمیت آزاد اراکین نے بھی شرکت کی جب کہ مخصوص نشستوں کے لیے نامزد کیے گئے اراکین بھی اجلاس میں شامل تھے، اجلاس میں کل 218 اراکین نے شرکت کی۔
پارلیمانی پارٹی کے اجلاس میں مسلم لیگ ن کے 137 کامیاب امیدوار، مخصوص نشستوں پر نامزد 58 خواتین اور مسلم لیگ ن میں شامل ہونے والے 22 سے زائد آزاد ارکان نے شرکت کی۔
اس موقع پر گفتگو کرتے ہوئے مریم نواز کا کہنا تھا کہ ہر حلقہ، ہر ضلع، ہر یونین کونسل، ہر ڈویژن کو ماڈل ہونا چاہیے، صحت، تعلیم، انفراسٹرکچر، امن و امان، زراعت اور آئی ٹی کے شعبوں میں وسائل برابر تقسیم کیے جائیں گے۔ پنجاب کے 297 حلقے میرے لیے ضلع ہوں گے۔انہوں نے کہا کہ حکومت اور پارٹی کی سطح پر ترجیحات کا روڈ میپ تیار کر لیا گیا ہے، عوامی خدمت کی اپنی روشن روایت کو برقرار رکھیں گے، نئے جذبے، عزم اور خلوص کے ساتھ خدمت کا سفر شروع کر رہے ہیں۔واضح رہے کہ پنجاب میں حکومت بنانے کے لیے 186 ارکان کی حمایت درکار ہے۔