اسرائیلی فوج کے غزہ پر حملوں کا سلسلہ جاری ,24 فلسطینی شہید

غزہ: اسرائیلی فوج کے غزہ پر حملوں کا سلسلہ جاری ہے، دیر البلاح میں رات گئے بے گھر فلسطینیوں کے گھروں پر اسرائیلی بمباری کے نتیجے میں 24 فلسطینی شہید ہوگئے۔
عرب میڈیا کے مطابق دیر البلاح میں ہونے والے بم دھماکے سے متعدد زخمیوں کی حالت تشویشناک ہے جب کہ اسپتال میں محدود سہولیات کے باعث ہلاکتوں میں اضافے کا خدشہ ہے۔ 24 گھنٹوں میں 104 فلسطینی اسرائیلی دہشت گردی کا نشانہ بنے۔
دوسری جانب فلسطینی پناہ گزینوں کے لیے اقوام متحدہ کے ادارے کے نمائندے کا کہنا ہے کہ اسرائیل کی جانب سے غزہ پر مسلسل بمباری کے باعث وہ شمالی غزہ میں مزید امدادی سرگرمیاں نہیں دے سکتے۔
شہریوں پر اسرائیلی حملوں اور خوراک کی امداد تک رسائی پر پابندیوں کا حوالہ دیتے ہوئے انہوں نے کہا ہے کہ شہری بھوک سے مر رہے ہیں۔واضح رہے کہ 7 اکتوبر سے اب تک شہید ہونے والے فلسطینیوں کی تعداد 29 ہزار سے تجاوز کر گئی ہے جب کہ اب تک 69 ہزار سے زائد افراد زخمی ہو چکے ہیں۔اقوام متحدہ کے مطابق غزہ میں ہلاک ہونے والوں میں 90 فیصد خواتین اور بچے ہیں جب کہ عالمی ادارہ صحت کا کہنا ہے کہ غزہ میں انسانی اور صحت کی صورتحال کی تباہی کے باعث غزہ موت کا علاقہ بن چکا ہے۔اس کے علاوہ اسرائیل نے مغربی کنارے میں مزید 3 ہزار مکانات بنانے کا اعلان کیا ہے۔ غیر ملکی میڈیا کے مطابق اسرائیل نے مغربی کنارے میں یہودی آباد کاری کے لیے نئے متنازع منصوبے کا اعلان کیا ہے۔امریکہ نے اسرائیل کے متنازعہ آباد کاری کے منصوبے پر مایوسی کا اظہار کیا ہے۔