گوادر میں کئی گھنٹے سے بارش جاری، مختلف علاقے مکمل ڈوب گئے، ہنگامی صورتحال

گوادر: موسلا دھار بارشوں کے بعد متعدد رہائشی علاقے زیر آب آنے سے شہری بڑی تعداد میں نقل مکانی کر رہے ہیں۔شدید بارشوں کے باعث گوادر کی پرانی آبادی، سربندن، مالابند وارڈ اور دیگر علاقوں میں ندی نالوں کا منظر پیش کرنے لگا۔
بارشوں کے دوران کئی علاقے زیر آب آنے کے بعد خواتین، بچوں اور بزرگوں سمیت شہریوں کو دوسرے محلوں اور مدارس یا بلند و بالا عمارتوں میں منتقل کیا جا رہا ہے۔
ڈپٹی کمشنر گوادر اور ضلعی انتظامیہ کے حکام متاثرہ علاقوں کا دورہ کر رہے ہیں۔ اطلاعات کے مطابق سربندن اور گوادر میں متعدد کشتیاں ڈوب گئی ہیں جس سے ماہی گیروں کا روزگار بھی شدید متاثر ہوا ہے۔ گوادر شہر کے مختلف علاقوں سے مکانات گرنے کی اطلاعات بھی موصول ہوئی ہیں جب کہ شہری اپنے ہاتھوں سے نکاسی آب کے لیے کوشاں ہیں۔
گوادر اور سربندن کے درمیان مکران کوسٹل ہائی وے مسلسل بارش کے باعث زیر آب آ گئی۔ اس حوالے سے پی ڈی ایم اے نے تمام اضلاع کی انتظامیہ کو الرٹ جاری کر دیا ہے۔ مراسلہ میں کہا گیا ہے کہ گرج چمک کے ساتھ مزید بارش اور بالائی علاقوں میں بڑے پیمانے پر برف باری کا امکان ہے۔ بارش اور برف باری کا سلسلہ 29 فروری سے 2 مارچ تک جاری رہے گا۔