اسلام آباد بلدیاتی ایکٹ 2024 منظور!

اسلام آباد(سٹاف رپورٹر) قومی اسمبلی نے اسلام آباد بلدیاتی ایکٹ 2024کی منظوری دے دی بل کے تحت اسلام آباد بلدیاتی انتخابات ایکٹ میں یونین کونسل کی سطح پر منتخب نمائندوں کی تعداد بڑھا دی گئی، قومی اسمبلی سے منظور بل کے تحت ہر یونین کونسل 15 ممبران پر مشتمل ہوگی۔اسلام آباد بلدیاتی انتخابات ترمیمی ایکٹ 2024وفاقی وزیر قانون اعظم نذیر تارڑ نے پیش کیا انہوں نے کہا کہ یہ بل گراس روٹ پر سروسز فراہم کرنے کے لئے لایا جارہا ہے یونین کونسل میں زیادہ لوگوں کو نمائندگی دینے سے لوگوں کے کام میں آسانی ہوگی۔بل کے تحت یونین کونسل چیئرمین، وائس چیئرمین، 9 جنرل ممبران کے علاوہ خاتون، نوجوان، اقلیت اور ٹیکنوکریٹ یا مزدور ممبران پر مشتمل ہوگی۔بل کے تحت چیئرمین اور وائس چیئرمین کا انتخاب براہ راست نہیں ہوگا، ہر یونین میں 9جنرل ممبران کا براہ راست انتخاب کیا جائیگا یونین کونسل سطح پر ووٹرز جنرل ممبران منتخب کرینگے ۔بل کے تحت ہر یونین کونسل سطح پر 9 منتخب جنرل ممبران خفیہ رائے شماری کے ذریعے خاتون، اقلیت، نوجوان اور ٹیکنوکریٹ یا مزدور کی نشست کے اراکین کا چنا کریں گے، جبکہ یونین کونسل کے منتخب جنرل ممبران اور مخصوص نشستوں کے ارکان چیئرمین اور وائس چیئرمین کا انتخاب کرینگے۔