ملتان سلطانز کے بیٹر عثمان خان نے پی ایس ایل میں نئی تاریخ رقم کر دی

ملتان سلطانز کے عثمان خان پاکستان سپر لیگ (پی ایس ایل)کے ایک ایڈیشن میں دو سنچریاں اسکور کرنے والے پہلے کرکٹر بن گئے۔راولپنڈی میں کھیلے جارہے میچ میں ملتان سلطانز کی نمائندگی کرنے والے عثمان خان نے ایونٹ میں دوسری سینچری اسکور کی، انہوں نے 50 گیندوں پر 200 کے اسٹرئیک ریٹ کے ساتھ 15 چوکوں اور 3 چھکوں کی مدد سے 100 رنز کی جارحانہ اننگز کھیلی۔
عثمان خان کی جانب سے پی ایس ایل کی یہ تیسری سنچری ہے، اس سے قبل ایونٹ میں تیز ترین سینچری اسکور کرنے کا اعزاز بھی انہی کے نام ہے، جو انہوں نے گزشتہ برس بنائی تھی۔
رواں سیزن میں عثمان نے پہلی سینچری کراچی کنگز کیخلاف اسکور کی تھی جس میں انہوں نے 59 گیندوں پر 106 رنز بنائے تھے۔واضح رہے کہ عثمان خان پہلے کرکٹر ہیں جنہوں نے ایک سیزن بطور لوکل پلئیر جبکہ گزشتہ دو سیزن بطور اوور سیز کرکٹر کی حیثیت سے کھیلے ہیں۔