میرا جنازہ تھیٹر سے نکالا جائے، مصری اداکارہ سلوی محمد علی

مصر کی سینیئر اداکارہ، فلم ساز و پروڈیوسر سلوی محمد علی نے خواہش کا اظہار کرتے ہوئے وصیت کی ہے کہ ان کا جنازہ تھیٹر سے نکالا جائے۔
مصری نشریاتی ادارے کو دیے گئے انٹرویو میں سلوی محمد علی نے اپنے کیریئر سمیت مصر میں فنون لطیفہ اور خصوصی طور پر تھیٹر کی تاریخ اور اہمیت پر بھی کھل کر بات کی۔
انہوں نے پروگرام کے دوران مصر کی جانب سے فلسطین کی حمایت جاری رکھنے پر بھی بات کی اور کہا کہ فلسطینیوں کو کسی بھی حال میں تنہا نہیں چھوڑ ا جائے گا۔
نشریاتی ادارے العربیہ کے مطابق پروگرام کے دوران انہوں نے دعوی کیا کہ مصر کے لیجنڈری تھیٹر اداکاروں کے جنازے گھروں اور مسجدوں سے نہیں بلکہ تھیٹرز سے نکلے ہیں اور یہ فن کو خراج تحسین پیش کرنے کی اچھی روایت ہے۔
انہوں نے بتایا کہ مصر کے بڑے ہدایت کاروں اور تھیٹر اداکاروں کے جنازے بھی تھیٹرز اور میوزیم سے نکالے گئے اور ان کی بھی خواہش ہے کہ ان کا جنازہ بھی ایسے ہی نکالا جائے۔
سلوی محمد علی کا کہنا تھا کہ تھیٹر اور اسٹیج ان کی پہچان ہیں، انہوں نے وہیں سے کیریئر شروع کیا اور نام بنایا۔
اداکارہ کا کہنا تھا کہ انہوں نے وصیت کر رکھی ہے کہ ان کا جنازہ نیشنل میوزیم آف تھیٹر سے نکالا جائے۔
سلوی محمد علی کے مطابق ان کی خواہش ہے کہ ان کا جنازہ تھیٹر سے نکال کر مسجد یا جنازہ گاہ لے جایا جائے، جہاں نماز کی تدفین کے بعد انہیں تھیٹرز اداکاروں کے ساتھ دفنایا جائے۔
سینیئر اداکارہ کی جانب سے جنازے کو تھیٹر سے نکالنے کی بات کہنے پر تنقید کا سامنا ہے اور نہ صرف مصر بلکہ عرب سوشل میڈیا پر بھی اداکارہ کو آڑے ہاتھوں لیا گیا۔
العربیہ اردو کی ایک رپورٹ کے مطابق مصر کے نیشنل تھیٹر سے منسلک سلوی محمد علی نے ایک انٹرویو کے دوران اپنی عجیب و غریب خواہش کا اظہار کیا۔دوران انٹرویو سلوی محمد علی نے وصیت کی کہ میری لاش کو پہلے تھیٹر سے نکالاجائے اور اس کے بعد نمازہ جنازہ کیلئے مسجد لے جائی جائے ۔
اداکارہ نے اپنی خواہش کی وضاحت کرتے ہوئے بتایا کہ نیشنل تھیٹر سے ہی میں نے اپنی اداکاری کا خواب مکمل کیا، اس تھیٹر سے میری کئی کامیابیاں جڑی ہیں اور یہی وجہ ہے کہ مجھے نیشنل تھیٹر بہت پسند ہے۔
اداکارہ کی وصیت نے سوشل میڈیا پر ایک نئے تنازع کو جنم دیدیا ہے اور اداکارہ کو سوشل میڈیا صارفین کی جانب سے شدید تنقید کا سامنا ہے۔
تاہم بعض صارفین ان کی حمایت بھی کرتے دکھائی دیے اور دلیل دی کہ اداکارہ کی خواہش میں کوئی غلط بات نہیں، جنازہ تھیٹر سے نکالنے میں کوئی حرج نہیں، جس طرح استاد کا جنازہ اسکول سے نکالاجا سکتا ہے، اسی طرح اداکار کا جنازہ تھیٹر سے نکالنے میں برائی نہیں۔