حیدرآباد: متحدہ قومی موومنٹ پاکستان کے کنوینر ڈاکٹر خالد مقبول صدیقی نے کہا کہ پیپلز پارٹی نے زمین اور اپنا ضمیر بیچ کر 50 ہزار ارب روپے کمائے۔
حیدر آباد میں انتخابی جلسے سے خطاب کرتے ہوئے ان کا کہنا تھا کہ ہم نے بے نظیر کو دو بار وزیراعظم بنایا، پھر ہم پرہی آپریشن شروع کیا گیا، پیپلز پارٹی یاد رکھنا آپ کو بخشا نہیں جائے گا، حیدرآباد والوں آج تیر کے دفن ہونے کا دن ہے ۔
خالد مقبول صدیقی نے کہا کہ آج آپ نے پکے قلعہ کی گرانڈ بھر کر سوچنے پر مجبور کر دیا کہ جشن کہاں منائیں؟ آج حیدر آباد والو آپ کو دیکھ کر آپ کا دشمن اپنی موت آپ مر گیا ہے’ آپ نے اپنے ساتھ پچاس پچاس ‘سو لوگوں کو لے جاکر ووٹ ڈالنا ہے۔
انہوں نے کہا کہ دیکھو پاکستان کے لوگو، آج حیدرآباد کو گراؤنڈ چھوٹی پڑ گئی ہے، آج یہ شہر وارننگ دینے آیا ہے، آج حیدرآباد کے جیالینکلے ہیں، جو خواب میں دیکھ رہے تھے وہی حیدرآباد کی تعبیر دے رہا ہے۔
خالد مقبول صدیقی نے مزید کہا کہ پیپلز پارٹی تمہیں چھوڑا نہیں جائے گا’ یہ قوم آپ سے 15 سال کا حساب لے گی، 15 سال آپ نے ہماری مرضی کے بغیر قبضہ کیا، ایم کیو ایم اس کا حساب لے گی، ہم پاکستان کے معمار ہیں۔
انہوں نے کہا کہ آج حیدرآباد میں ہونے والے جلسے میں شرکت کرنے والوں نے ایم کیو ایم کے ایم پی ایز اور ایم این ایز کو جتوا دیا ہے، میں آپ سب کو آج کی کامیابی پر مبارکباد پیش کرتا ہوں۔
