شب برات آج عقیدت و احترام سے منائی جائے گی

اسلام آباد: ملک بھر میں شب برات آج عقیدت و احترام سے منائی جائے گی، مساجد اور گھروں میں بعد از نماز عشا اور شب بیداری کے خصوصی انتظامات کیے جائیں گے۔
ماہ شعبان کی پندرہویں رات رحمتوں اور برکتوں والی رات ہے۔ اس رات کو لیلة المبارکہ، برکتوں کی رات، لیة الصک، تقسیم امور کی رات اور لیلة الرحمة، رحمت کی رات بھی کہا جاتا ہے۔
شب برات کے اجتماعات میں مساجد میں خصوصی نوافل کی ادائیگی، اللہ کے حضور گناہوں سے توبہ، مغفرت و بخشش، ایمان و سلامتی، رزق کی کشادگی اور پاکستان کی سلامتی کے لیے خصوصی دعائیں کی جائیں گی۔شب برات کے سلسلے میں شہر بھر کی مساجد کو برقی قمقموں سے سجا دیا گیا ہے، شہری اپنے پیاروں کی قبروں پر حاضری دیں گے، پھول چڑھائیں گے اور فاتحہ خوانی کریں گے۔