پریزائیڈنگ افسر نے پولنگ ختم ہونے سے قبل ہی فارم 45 پر دستخط کروا لیے

لاہور: پنجاب اسمبلی کی نشست پی پی 149 کے پولنگ اسٹیشن 127 پر پریزائیڈنگ افسر نے پولنگ ایجنٹوں سے قبل از وقت ہی فارم 45 پر دستخط کروا لیے۔
سنی اتحاد کونسل کے کارکنوں کی جانب سے پولنگ اسٹیشن پر احتجاج کیا گیا۔ کارکنان کا کہنا تھا کہ فارم پر پہلے سائن کیوں کرائے یہ دھاندلی ہے۔ احتجاج کرتے ہوئے کارکنان نے نعرے بازی کی اور مطالبے پر پریزائیڈنگ افسر نے بھی اعتراف کر لیا۔
پریزائیڈنگ افسر اقبال نے کہا کہ شام کو وقت کم ہوتا ہے اس لیے فارم پر دستخط وقت بچانے کے لیے کروائے۔ سنی اتحاد کونسل رہنما نے کہا کہ یہ پری پول رگنگ ہے لہذا پریزائیڈنگ افسر کو گرفتار کیا جائے۔
احتجاج کے بعد پریزائیڈنگ افسر نے دستخط شدہ فارم 45 پھاڑ دیے۔
الیکشن کمیشن نے پریذائیڈنگ افسر کی جانب سے پولنگ ایجنٹس سے فارم 45 پر پیشگی دستخط کروائے جانے کے معاملے کا سخت نوٹس لیتے ہوئے صوبائی الیکشن کمشنر پنجاب سے فوری رپورٹ طلب کر لی ہے تاکہ اس معاملہ پر کمیشن مزید قانونی کارروائی عمل میں لا سکے۔