وزیراعلی پنجاب مریم نواز کا پنجاب سیف سٹی اتھارٹی ہیڈ کوارٹر کا دورہ

نومنتخب وزیراعلی پنجاب مریم نواز نے 31 دسمبر تک تمام اضلاع میں سمارٹ سیف سٹی پراجیکٹ شروع کرنے کا حکم دے دیا۔ وزیراعلی پنجاب نے پنجاب سیف سٹی اتھارٹی ہیڈ کوارٹر کا دورہ کرتے ہوئے خواتین کے تحفظ کے لیے اپ گریڈ شدہ ویمن سیفٹی ایپ لانچ کرنے کی ہدایت بھی کی’ساتھ ہی انہوں نے ویمن سیفٹی ایپ کو 2 ہفتوں میں فعال بنانے کی ہدایات جاری کیں اور پنجاب سیف سٹی اتھارٹی کی خواتین کمیونیکیشن آفیسرز کے لیے ہاسٹل بنانے کا اعلان کیا۔
مریم نواز کو دورے کے دوران بریفنگ میں بتایا گیا کہ جرائم کی بروقت روک تھام کے لیے سیف سٹی کرائم سٹاپ ایپ کا ٹرائل رن شروع کر دیا گیا ہے، کیمروں سے ہسپتالوں، بس سٹینڈز، ایئرپورٹس، ریلوے سٹیشنز، شاپنگ مالز کی نگرانی کی جائے گی۔
انہیں مزید بتایا گیا کہ ہیلمٹ، سیٹ بیلٹ اور ہتھیاروں کی نمائش کو روکنے کے لیے مصنوعی ذہانت پر مبنی سافٹ ویئر بھی تیار کیا گیا ہے۔
وزیراعلی پنجاب مریم نواز نے سیف سٹی اتھارٹی ڈیٹا سینٹر اور ڈیجیٹل وال کا بھی معائنہ کیا، مریم نواز نے لیڈی پولیس کمیونیکیشن آفیسر سے ان کی ڈیسک پر جا کر بات چیت کی اور سیف سٹی مانیٹرنگ کے عمل کا مشاہدہ کیا۔
اس کے علاوہ وزیراعلی نے تونسہ میں فیکٹری میں چوری کی کال پر رسپانس کا بھی جائزہ لیا، مریم نواز نے 15 پر کال کی اور پولیس کا رسپانس ٹائم چیک کیا۔