وزیراعلی کا پونچھ ہاؤس میں ماڈل رمضان بازار کے کنٹرول روم کا دورہ

لاہور: وزیراعلی پنجاب مریم نواز شریف اچانک پونچھ ہاؤس میں واقع ماڈل رمضان بازار کے کنٹرول روم پہنچ گئیں۔وزیراعلی پنجاب مریم نواز شریف نے صوبائی ماڈل مارکیٹ کنٹرول روم میں مانیٹرنگ کا جائزہ لیا، ڈسٹرکٹ ڈیش بورڈ اور پی آئی ٹی بی کے ڈیش بورڈ کا مشاہدہ کیا۔
مریم نواز نے پرائس ایپ کے ڈیش بورڈ کا بھی جائزہ لیا اور ڈیش بورڈ پر پیش کیے گئے ڈیٹا کے بارے میں آگاہی حاصل کی۔وزیراعلی پنجاب نے کہا کہ عوام کو ان کا حق ان کی دہلیز پر پہنچانا چاہتے ہیں، رکاوٹ یا کوتاہی برداشت نہیں کریں گے، لوگوں کو قطاروں میں کھڑا نہیں ہونے دیں گے، رمضان پیکج اور دیگر مسائل کے بارے میں ڈسٹرکٹ سکور کارڈ بنایا جائے گا۔ خلاف ورزی کی صورت میں نمبر کم کر دیے جائیں گے۔
مریم نواز نے ڈیش بورڈ میں ہوم ڈیلیوری کی معلومات بھی شامل کرنے کی ہدایت کی۔وزیراعلی کو بریفنگ میں بتایا گیا کہ 10 رمضان تک رمضان کیئر پیکج تمام ضرورت مندوں تک پہنچ جائے گا۔
اس موقع پر چیف سیکرٹری زاہد زمان اختر، سیکرٹری انڈسٹریز احسان بھٹہ، ڈی جی انڈسٹریز آصف علی فرخ بھی موجود تھے۔