ٹریکٹرز اور کیڑے مار ادویات پر ٹیکس چھوٹ ختم کئے جانے کا امکان

اسلام آباد: آئندہ مالی سال 2024-25 کے بجٹ میں سیلز ٹیکس اور انکم ٹیکس کی رعایتیں اور چھوٹ مرحلہ وار ختم کیے جانے کا امکان ہے۔ ذرائع کے مطابق بجٹ میں امپورٹڈ ٹریکٹرز پر ٹیکس عائد کرنے اور کمرشل امپورٹرز پر ودہولڈنگ ٹیکس لگانے پر غور کیا جارہا ہے۔
بجٹ میں کمرشل درآمد کنندگان کی آمدن پر انکم ٹیکس ودہولڈنگ لگانے کی تجویز ہے۔ کمرشل امپورٹرز پر ایک فیصد ٹیکس لگانے سے سالانہ 25 ارب روپے تک ریونیو متوقع ہے۔
پرانی درآمدی گاڑیوں پر بھی ٹیکس بڑھانے، گندم کی درآمد کی حوصلہ شکنی کیلئے اضافی ٹیکس ڈیوٹی لگانے، ٹریکٹرز اور کیڑے مار ادویات پر ٹیکس چھوٹ ختم کیے جانے کا امکان ہے، تاہم ٹریکٹرز اور کیڑے مار ادویات پر ٹیکس استثنی کے خاتمے سے زرعی لاگت مزیدبڑھنے کا بھی خدشہ ہے۔
حکومت کو مختلف ٹیکس چھوٹ ختم ہونے سے مجموعی طور پر 30ارب روپے ریونیو حاصل ہونے کی توقع ہے۔