عدالتی کارروائی کی رپورٹنگ پر پابندی ‘پیمرا کا نوٹیفکیشن چیلنج ‘ کالعدم قرار دینے کا مطالبہ

لاہور ہائیکورٹ اور اسلام آباد ہائیکورٹ میں عدالتی کارروائی کی رپورٹنگ پرپابندی کا پیمرا کا نوٹیفکیشن چیلنج کردیا گیا۔
اسلام آباد ہائیکورٹ میں سپریم کورٹ اور ہائیکورٹ رپورٹرز کی نمائندہ تنظیموں کی جانب سے دائر درخواست میں کہا گیا ہے کہ پیمرا کا نوٹیفکیشن آرٹیکل 19 اور 19 اے کی خلاف ورزی ہے، نوٹیفکیشن غیرآئینی قرار دے کر کالعدم کیا جائے۔
خیال رہے کہ پاکستان الیکٹرانک میڈیا ریگولیٹری اتھارٹی (پیمرا) نے تحریری حکمنامے کے علاوہ دیگر عدالتی کارروائی نشر کرنے پر پابندی عائد کردی ہے۔
عدالتوں میں زیر سماعت کیسز کی رپورٹنگ سے متعلق پیمرا کے ہدایت نامے میں کہا گیا ہیکہ عدالتی کارروائی سے متعلق ٹکرز اور ہیڈ لائنز نشر کرنے سے گریز کیا جائے۔
پیمرا نے کہا ہے کہ صرف تحریری احکامات کی ہی خبر دی جائے۔ پیمرا کی ہدایات کے مطابق ٹی وی چینلز براہ راست نشر ہونے والی عدالتی کارروائی دکھا سکتے ہیں۔
پیمرا کے مطابق ٹی وی چینلز کوئی بھی ایسا مواد، گفتگو، تجویز یا رائے نشر کرنے سے گریز کریں جو عدالتی فیصلوں پر اثر انداز ہوسکتی ہو۔