پیٹرولیم ڈیلرز ایسوسی ایشن کا کل صبح 6 بجے سے پیٹرول پمپس بند کرنے کا فیصلہ

پاکستان پیٹرولیم ڈیلرز ایسوسی ایشن اور حکومت کے درمیان بجٹ میں 0.5 فیصد ایڈوانس ٹرن اوور ٹیکس کو واپس لینے کے حوالے سے کیے جانے والے مذکرات ناکام ہوگئے ہیں۔
پاکستان پیٹرولیم ڈیلرز اور حکومت کے مذاکرات ناکام ہونے کے بعد پیٹرولیم ڈیلرز ایسوسی نے 5 جولائی سے ملک بھر کے پیٹرول پمپس بند کرنے کا اعلان کردیا۔
پیٹرولیم ڈیلرز ایسوسی کے صدر عبد السمیع خان نے کہا ہے کہ ہڑتال کا دورانیہ ایک دن سے زیادہ بھی ممکن ہے اور ڈیلرز کو کہا ہے کہ 4 جولائی تک کا پیٹرول پمپس پر رکھیں۔
انہوں نے کہا کہ آج رات سے ملک بھر کے پمپس ڈرائی ہونا شروع ہو جائیں گے، جب تک حکومت اس کو واپس نہیں لیتی کوئی مذاکرات نہیں ہوں گے، ملک بھر میں 14ہزار ڈیلرز اپنے پمپ 5 جولائی سے بند کر دیں گے۔انہوں نے شہریوں سے اپیل کی ہے کہ وہ اپنی گاڑیوں میں پیڑول بھروا لیں۔
صدر پیٹرولیم ڈیلرز ایسوسی نے کہا کہ وزیر خزانہ، چیئرمین ایف بی آر اور چیئرمین اوگرا سے ملاقاتیں ہوئیں لیکن مذاکرات میں کوئی نتیجہ نہیں نکلا جس کے سبب ہڑتال کر رہے ہیں، ڈبل ٹیکسیشن آئین کی خلاف ورزی ہے۔