مریم نواز کی ای بائیک کی قسط کم از کم مقرر کرنے کی ہدایت

لاہور:وزیر اعلی پنجاب مریم نواز شریف نے ای بائیک پراجیکٹ میں قسط کم از کم مقرر کرنے کی ہدایت کر دی، مریم نواز کا کہنا تھا کہ پنجاب طلبہ کو سہولیات کی فراہمی میں ہمیشہ کی طرح لیڈ کرے گا۔
تاریخ میں پہلی مرتبہ چیف منسٹر یوتھ انیشیٹو کے تحت طلبہ کیلئے ای اور پٹرول بائیکس کی فراہمی کی جا رہی ہے، وزیر اعلی پنجاب کا کہنا تھا کہ ای بائیک پراجیکٹ بائیکس کی فراہمی کا منصوبہ طلبہ کیلئے آسانیاں پیدا کرے گا، ذاتی سواری طلبہ کے روز مرہ زندگی میں پیسے اور وقت کی بچت یقینی بنائے گی۔
مریم نواز شریف نے کہا کہ وقت کی بچت اور سفر میں آسانی طلبہ کی تعلیمی استعداد کار میں بہتری کا سبب بنے گی، والدین کے سایہ سے محروم طلبہ کیلئے ای بائیک سکیم میں والدین کی گارنٹی کی شرط ختم کر دی، پنجاب کو بھی دنیا کی طرح الیکٹرک ٹرانسپورٹ پر منتقل کرنا چاہتے ہیں۔
پنجاب بھر میں ای بائیکس کی چارجنگ کیلئے سولر ائزڈ چارجنگ سٹیشن بنائیں گے جبکہ طلبہ کیلئے ای بائیک کی بیٹری کی انشورنس اور وارنٹی بھی دی گئی، بائیکس کے ساتھ ہیلمٹ اور کائٹ پروٹیکشن بھی ضروری ہے۔
وزیر اعلی پنجاب مریم نواز نے کہا کہ بچوں اور بچیوں کو آمدورفت میں آسانی کیلئے بائیکس دینے سے خوشی ملی، ای بائیک سے سموگ اور ماحولیاتی آلودگی میں کمی آئے گی جبکہ کالجوں اور یونیورسٹیوں میں سولرائزڈ چارجنگ سٹیشن قائم کیے جائیں گے۔