گولڈ میڈل جیتنے پر ارشد ندیم کیلئے بھارت سے بھی تہنیتی پیغامات

نئی دہلی: ایتھلیٹ ارشد ندیم نے پیرس اولمپکس میں جیولین تھرو مقابلے میں 118 سالہ ریکارڈ توڑتے ہوئے میدان مارلیا اور پاکستان کو 40 سال بعد گولڈ میڈل دلانے میں کامیاب ہوگئے۔
ارشد ندیم کا اس سے قبل بھی بھارتی کھلاڑی نیرج چوپڑہ سے کانٹے کا مقابلہ ہوچکا ہے اور پیرس میں ہونے والے اولمپک مقابلوں میں بھی دونوں روایتی حریفوں کے درمیان مقابلہ تھا۔
تاہم آج جب ارشد ندیم نے جیولن تھرو مقابلے میں 92.97 میٹر کی تھرو کرکے 118 سالہ ریکارڈ توڑا تو عالمی سطح پر ان کی صلاحیتوں کو تسلیم کیا گیا۔ اس فتح کو بھارتی کھلاڑی نیرج اور ان کی والدہ نے بھی سراہا۔
بھارتی میڈیا بھی ارشد ندیم کی اس حیران کن پرفارمنس پر داد دیے بغیر نہ رہ سکا۔عالمی ایونٹ کی براہ راست کوریج کرنے والے بھاری صحافیوں، سابق ایتھلیٹس اور اینکرز ارشد ندیم کے گن گانے نظر آئے۔
اس کامیابی کے بعد ارشد ندیم کیلئے ہر طرف سے مبارک ، سلامت کے پیغامات بھیجے جارہے ہیں۔ ایسے میں بھارت سے بھی تہنیتی پیغامات آرہے ہیں۔
ارشد ندیم کے کارنامے پر سابق بھارتی ٹیسٹ کرکٹر یووراج سنگھ نے سوشل میڈل پر نیرج چوپڑا کو سلور میڈل جیتنے پر سراہا اور ساتھ ہی پاکستان کے ارشد ندیم کو گولڈ میڈل جیتنے پر دل کی گہرائیوں سے مبارکباد دی۔
سابق بھارتی کرکٹر اور معروف کمنٹیٹر روی شاستری نے کہا کہ ارشد ندیم کی دو بار 90 میٹر کی تھرو غیر معمولی اور شاندار تھی، ایسا پہلے کبھی سننے کو نہیں ملا۔
اس کے علاوہ سابق بھارتی بیٹر محمد کیف کا کہنا تھا کہ بھارت اور پاکستان کے لیے یہ قابلِ فخر لمحہ ہے، یہ کھیل ہم سب کو متحد کرتے ہیں۔
بھارتی میڈیا پر کھیلوں کے ان تجزیہ کاروں نے کہا کہ نیرج چوپڑہ کی کارکردگی توقع کے عین مطابق اور شاندار تھی لیکن ارشد ندیم نے آج سب کو آوٹ کلاس کردیا۔
بھارتی میڈیا نے ارشد ندیم کی زندگی سے متعلق اور اس اعزاز کے حاصل کرنے تک کی جدوجہد کو بیان کرتے ہوئے پاکستانی ایتھلیٹ کے عزم اور حوصلے کی بھی تعریف کی۔