حسن نصراللہ کی شہادت پر ریلی،پولیس اور مظاہرین میں جھڑپ

کراچی (بیورورپورٹ)کراچی میں آئی ایس او اور دیگر تنظیموں کی جانب سے حسن نصراللہ کی شہادت کے خلاف نمائش چورنگی سے احتجاجی ریلی سے نکالی گئی۔ اس موقع پر ایم ٹی خان روڈ پر امریکی قونصلیٹ جانے والے راستوں کو کنٹینرز لگاکر بند کردیا گیا تھا۔ریلی کے شرکا نے ایم ٹی خان روڈ پہنچ کر شدید نعرے لگائے، شرکا نے امریکی قونصلیٹ جانے کی کوشش کی تو پولیس کے روکنے پر مظاہرین نے پتھرا ئوکیا جس کے جواب میں پولیس کی جانب سے شیلنگ کی گئی۔مظاہرین کے پتھرا سے متعدد پولیس اہلکار زخمی ہوگئے، زخمیوں میں ایس ایچ او موچکو انسپکٹر بشیر بھی شامل ہیں جبکہ پولیس کی جانب سے کئی کارکنان کو حراست میں بھی لیا گیا۔پولیس اور ریلی کے شرکا میں پتھراو کے دوران مشتعل افراد کے تشدد سے جیونیوز کے صحافی دانیال سید اور دیگر صحافی زخمی ہوگئے۔پولیس کی جانب سے کارکنان کی رہائی پر احتجاجی مظاہرین منتشر ہوگئے۔