ہمیں سلیکٹڈ کہا گیا لیکن اب مدر آف آل سلیکٹڈ ہورہا ہے، عمران خان

راولپنڈی: پی ٹی آئی کے بانی عمران خان نے کہا ہے کہ ہمیں سلیکٹڈ کہا جاتا تھا لیکن یہاں اب مدر آف آل سلیکٹڈ کیا جارہا ہے۔
اڈیالہ جیل میں سائفرکیس کی سماعت کے بعد عمران خان نے میڈیا نمائندوں سے غیر رسمی گفتگو کرتے ہوئے کہا کہ ہمیں ساڑھے تین سال سے سلیکٹڈکہاگیا لیکن جس طرح نواز شریف کو یہاں لایا گیا اب مدد آف آل سلیکٹڈ کیا جا رہا ہے۔ میں نے ملکی تاریخ میں کبھی ایسا سلیکشن نہیں کیا، ایک سرٹیفائیڈ منی لانڈرر کے تمام کیسز خارج کر دیے گئے۔
انہوں نے کہا کہ نگران حکومت اور الیکشن کمیشن بھی اس مجرم کی مدد کر رہے ہیں، سی سی پی او لاہور سند یافتہ مجرم کو سیلوٹ مار رہے ہیں، وہ ہمیں غلام بنا رہے ہیں، میں پوری جماعت کو کہہ رہا ہوں کہ اتوار کو باہر نکلیں۔
انہوں نے کہا کہ جمہوریت کا مطلب غلامی نامنظور اور آزادی ہے، ہماری مہم قانون کی حکمرانی کے لیے ہے اور قانون کی حکمرانی بھی آزادی کی ضمانت دیتی ہے، لیکن یہ چور اس ملک میں قانون کی حکمرانی اور انصاف کا بول بالا نہیں ہونے دیں گے۔