8 فروری کو 9 مئی والوں کو اٹھا کر باہر پھینکنا ہے، مریم نواز

لاہور: مسلم لیگ(ن) کی چیف آرگنائزر مریم نواز نے کہا ہے کہ نواز شریف اپنے مفاد کے لیے نہیں بلکہ قوم کی خاطر الیکشن لڑنا چاہتے ہیں کہ قوم اس وقت مسائل کا شکار ہے۔
لاہور کے علاقے انارکلی میں مسلم لیگ ن کے جلسہ عام سے خطاب کرتے ہوئے انہوں نے کہا کہ نواز شریف کو بیٹے سے تنخواہ نہ لینے پر نااہل کیا گیا۔ نواز شریف قوم کا خدمت گزار ہے’ نواز شریف جب آتا ہے تو مہنگائی کمی ہوتی ہے ملک ترقی کرتا ہے’ آٹا سستا ہوتاہے۔
انہوں نے کہا کہ ہمارا مقابلہ کسی سیاسی جماعت سے نہیں، ہم نومئی کے لوگ نہیں، ہم 28 مئی کے لوگ ہیں، دونوں تاریخوں میں بڑی تاریخ موجودہے۔ جو ظلم اور جبر زیادتی ہمارے ساتھ ہوئی وہ کسی کے ساتھ نہیں ہوئی’ اگر ہم آج بھی الیکشن لڑنا چاہتے ہیں تو صرف قوم کی خاطر’ تکلیف ہے تو صرف مہنگائی کی’بجلی کے زائد بلوں کی ‘ لاہور میںپانچ سال گھس بیٹھیے آگئے جنہوں نے لاہور تباہ کر دیا۔
مریم نواز نے کہا کہ جب ہماری حکومت تھی تو لاہور میں ہر سال نئے منصوبے آتے تھے، اب یہاں کوئی پرسان حال نہیں، عوام مجھ سے وعدہ کریں کہ الیکشن میں کوئی گھر نہیں بیٹھے گا اور نواز شریف کو ووٹ دیں گے۔