حکومتی سرکل سے یہ بات سامنے آئی کہ کھلی دھاندلی ہوئی ہے: علی محمد

اسلام آباد: پاکستان تحریک انصاف کے سینئر رہنما علی محمد خان نے کہا کہ حکومتی حلقے سے یہ بات سامنے آئی ہے کہ کھلی دھاندلی ہوئی ہے، کمشنر راولپنڈی نے سب کو کھل کر بتا دیا ہے۔
میڈیا سے گفتگو کرتے ہوئے علی محمد خان نے کہا کہ پی ٹی آئی کے بانی سے پوچھا گیا کہ باہر آکر بدلہ لیں گے؟۔ بانی پی ٹی آئی نے کہا کہ ہم فتح مکہ کے ماڈل پر جائیں گے، سیاسی انتقام نہیں بلکہ سیاسی استحکام کی طرف جائیں گے۔
انہوں نے کہا کہ اگر قوم کی ماننی ہے تو جو قوم نے کہا ہے اسے ماننا پڑے گا۔ عوام نے جھولیاں بھر بھر کے ووٹ دیا۔
علی محمد خان نے کہا کہ ہمارے لیڈر کو جیل میں ڈالا گیا، ڈاکٹر یاسمین راشد ، ہمارے گورنر کو جیل میں رکھا گیا، عامر ڈوگر صاحب نے ملک میں پارٹی کو اکٹھا کر رکھا ہے۔
انہوں نے کہا کہ ہماری پارٹی کے کارکن مشکل وقت میں بھی پی ٹی آئی کے ساتھ رہے، پی ٹی آئی کے بانی نے کہا ہے کہ انٹرا پارٹی الیکشن جلد کرائے جائیں، ہم نے پہلے بھی درست انٹرا پارٹی الیکشن کرائے تھے۔