چڑیا گھر میں مگرمچھ کے پیٹ سے 70سکے نکال لیے گئے

امریکی چڑیا گھر میں مگرمچھ کے پیٹ سے 70 سکے نکال لیے گئے۔غیر ملکی میڈیا کے مطابق زیر غور واقعہ نیبراسکا کے شہر اوماہا کے ہنری ڈورلی چڑیا گھر میں تھیبوڈاکس نامی 36 سالہ مگرمچھ کے معمول کے چیک اپ کے دوران پیش آیا۔
بتایا جا رہا ہے کہ مگرمچھ کا معمول کے مطابق چیک اپ میٹل ڈیٹیکٹر سے کیا جا رہا تھا، لیکن جب سکوں کا پتہ چلا تو مگرمچھ کی جان بچانے کے لیے فوری علاج کیا گیا۔
میڈیا رپورٹس کے مطابق چڑیا گھر کے ماہرین نے مگرمچھ کو بے ہوشی کرنے کے بعد اس کے پیٹ میں کیمرہ لگا کر سرجری کی جس کی مدد سے مگرمچھ کے پیٹ سے 70 سکے کامیابی سے نکال لیے گئے۔
ویٹرنری ڈاکٹر کرسٹینا پلگ نے تجویز پیش کی کہ مگرمچھ کے پیٹ میں پائے جانے والے سکے چڑیا گھر کے زائرین کی وجہ سے ہوئے ہیں جو اپنی خواہشات کے لیے مگرمچھ کے تالاب میں سکے گراتے ہیں۔
میڈیا رپورٹس کے مطابق اس واقعے کے بعد سے چڑیا گھر انتظامیہ نے سیاحوں کو جانوروں کے تالاب میں سکے ڈالنے سے سختی سے منع کر رکھا ہے۔