تجارتی سامان ضبطگی،بھارتی ہٹ دھرمی کی مذمت کرتے ہیں، ترجمان دفتر خارجہ ممتاز زہرہ بلوچ

پاکستان نے تجارتی سامان ضبط کرنے میں بھارت کی ہٹ دھرمی کی مذمت کی ہے۔
دفتر خارجہ کی ترجمان ممتاز زہرہ بلوچ نے بھارت کی جانب سے پاکستان کے لیے تجارتی سازوسامان ضبط کیے جانے کے حوالے سے میڈیا کے سوالات کے جواب میں کہا کہ یہ رپورٹس بھارتی میڈیا کی جانب سے حقائق کی غلط بیانی کی عکاسی کرتی ہیں۔
انہوں نے کہا کہ یہ معاملہ کراچی میں واقع ایک تجارتی کمپنی کی طرف سے کمرشل لیتھ مشین کی درآمد کا ایک سادہ سا معاملہہے جو پاکستان میں آٹوموبائل انڈسٹری کو پرزے فراہم کرتی ہے۔
ان کا کہنا تھا کہ آلات کی تفصیلات واضح طور پر اس کے خالص تجارتی استعمال کی نشاندہی کرتی ہیں، کہ یہ لین دین تمام متعلقہ دستاویزات کے ساتھ شفاف بینکنگ چینلز کے ذریعے کیا جا رہا ہے۔
ترجمان نے کہا کہ متعلقہ نجی ادارے اس غیر منصفانہ ضبطی کے خلاف کیس کی پیروی کر رہے ہیں۔
انہوں نے کہا کہ پاکستان تجارتی سامان ضبط کرنے میں ہندوستان کی ہٹ دھرمی کی مذمت کرتا ہے، انہوں نے مزید کہا کہ آزاد تجارت کی یہ رکاوٹ مشکوک ساکھ والی ریاستوں کی جانب سے پولیس کے کردار کے من مانی مفروضے کے موروثی خطرات کی نشاندہی کرتی ہے۔
انہوں نے کہا کہ اس طرح کے اقدامات بعض ریاستوں کی بین الاقوامی اصولوں کی خلاف ورزی اور بین الاقوامی قوانین کی خلاف ورزی کرتے ہوئے من مانی کارروائیاں کرنے کی کھلی چھوٹ کا بھی مظہر ہیں۔