انتخابات میں مبینہ دھاندلی کیخلاف احتجاج، پی ٹی آئی رہنما و کارکن گرفتار

انتخابات میں مبینہ دھاندلی کے خلاف پاکستان تحریک انصاف کی جانب سے راولپنڈی اسلام آباد ‘کراچی اور لاہور سمیت ملک کے مختلف حصوں میں احتجاجی مظاہروں کا سلسلہ جاری ہے اور لاہور میں پولیس نے لاٹھی چارج کرتے ہوئے پی ٹی آئی کے متعدد کارکنوں کو حراست میں لے لیا ہے۔
احتجاجی مظاہرے سے خطاب کرتے ہوئے خرم شیر زمان سمیت تحریک انصاف کے مختلف رہنماؤں کا کہنا تھا کہ انتخابات میں پی ٹی آئی کے جیتنے والے امیدواروں کے نتائج تبدیل کیے گئے اور فارم 45 میں جیتنے والوں کی جیت کو شکست میں بدل دیا گیا۔
دوسری جانب پی ٹی آئی کے کارکنوں نے اسلام آباد میں نیشنل پریس کلب کے سامنے بھی احتجاج کیا۔
کراچی میں پریس کلب کے باہر تحریک انصاف کے مظاہرے میں خواتین کی بڑی تعداد بھی شریک ہے’جہاں پی ٹی آئی رہنماؤں نے ریلی سے خطاب کیا۔
اس کے علاوہ پشاور میں بھی مظاہرے کیے گئے تاہم سب سے بڑا مظاہرہ لاہور میں جاری ہے جہاں پولیس نے تحریک انصاف کے متعدد کارکنوں کو گرفتار بھی کرلیا۔
پنجاب پولیس نے لاہور ہائی کورٹ کے باہر جمع ہونے والے تحریک انصاف کے کارکنوں پر لاٹھی چارج کیا اور اس دوران پی ٹی آئی کے جھنڈے والی گاڑی کو گھیرے میں لے لیا اور ڈرائیور کو گاڑی سے باہر نکال دیا۔پولیس نے مال روڈ کے قریب احتجاج کرنے والے پی ٹی آئی کے 8 کارکنوں کو گرفتار کر لیا۔ہائی کورٹ کے قریب پولیس کی نفری تعینات تھی اور جیسے ہی تحریک انصاف کے کارکن احتجاج کرنے وہاں پہنچے تو پولیس نے انہیں گرفتار کر لیا جس کے بعد باقی مظاہرین منتشر ہو گئے۔
تحریک انصاف کے کارکنان کے ساتھ ساتھ انصاف لائرز فورم کے وکلا بھی لاہور ہائیکورٹ کے باہر جمع ہوئے اور انہیں احتجاج سے روکنے کے لیے پارکنگ میں بند کر دیا گیا۔
یاد رہے کہ تحریک انصاف کے رہنما اور کارکنان 8 فروری کو بانی عمران خان کی ہدایت پر عام انتخابات میں مبینہ دھاندلی کے خلاف احتجاج کر رہے ہیں۔گزشتہ روز تحریک انصاف کے رہنما رؤف حسن نے کہا کہ ہمارے ملک گیر احتجاج کا مقصد چوری شدہ مینڈیٹ کو واپس لانا ہے اور ہم آئین کے اندر رہتے ہوئے اپنی جدوجہد جاری رکھیں گے۔