تحریک انصاف کا انٹرا پارٹی الیکشن کرانے کا فیصلہ

اسلام آباد: پاکستان تحریک انصاف نے انٹرا پارٹی الیکشن کرانے کا فیصلہ کرلیا۔
تحریک انصاف کی جنرل باڈی کا اجلاس ہوا جس میں انٹرا پارٹی الیکشن کی قرارداد کی منظوری دی گئی۔ قرارداد منظور ہونے کے بعد سات دن کے اندر انتخابات کرائے جائیں گے۔
وفاقی الیکشن کمیشن کی ہدایات کے مطابق اسلام آباد، کراچی، لاہور سمیت دیگر شہروں میں بھی انتخابات ڈیجیٹل طریقے سے کرائے جاسکتے ہیں۔
اجلاس میں رؤف حسن کو متفقہ طور پر تحریک انصاف کا چیف الیکشن کمشنر مقرر کر دیا گیا۔
انٹرا پارٹی انتخابات کے فیصلے تک عمر ایوب پارٹی کے چیف آرگنائزر ہوں گے۔ صرف 31 جنوری 2024 تک پاکستان تحریک انصاف رابطہ ایپ پر رجسٹرڈ ممبران ہی الیکشن لڑنے اور ووٹ دینے کے اہل ہوں گے۔
عام انتخابات کے لیے پی ٹی آئی کی جانب سے نامزد کیے گئے امیدواروں کو آزاد تصور نہیں کیا جائے گا بلکہ وہ الیکشن کے بعد بھی پی ٹی آئی کا حصہ ہوں گے۔
قرارداد میں مزید کہا گیا کہ عمران خان تحریک انصاف کے بانی ہیں اور ہمیشہ ہمارے قائد رہیں گے۔