ای سی پی کی عام انتخابات بارے رپورٹ جاری’17816 امیدواروں نے الیکشن میں حصہ لیا

الیکشن کمیشن آف پاکستان (ای سی پی) نے عام انتخابات سے متعلق رپورٹ جاری کردی جس کے مطابق عام انتخابات میں ملک بھر سے 17 ہزار 816 امیدواروں نے حصہ لیا۔
الیکشن کمیشن کی رپورٹ میں بتایا گیا ہے کہ عام انتخابات میں 2 ہزار 158 ٹن واٹر مارک پیپرز استعمال کیے گئے، تین پرنٹنگ پریس سے بیلٹ پیپرز چھپوائے گئے جبکہ قومی اسمبلی کے ہر ریٹرننگ افسران کو 4 لیپ ٹاپ جبکہ صوبائی اسمبلی کے ریٹرننگ افسران کو 3 لیپ ٹاپ فراہم کیے گئے۔
رپورٹ میں کہا گیا ہے کہ عام انتخابات کے لیے قومی اور چاروں صوبائی اسمبلیوں کے 859 انتخابی حلقے بنائے گئے اور ملک بھر سے 17 ہزار 816 امیدواروں نے حصہ لیا، جبکہ عام انتخابات میں ضابطہ اخلاق کی خلاف ورزی کرنے پر ایک ہزار 899 سیاسی جماعتوں اور آزاد امیدواروں کو نوٹسز جاری کیے گئے۔الیکشن کمیشن کا کہنا ہے کہ عام انتخابات میں قومی اسمبلی اور صوبائی اسمبلی میں دو، دو خواجہ سراں نے حصہ لیا، انتخابات کے لیے 7 لاکھ بیلٹ باکس استعمال کیے گئے اور 1.5 لاکھ بیلٹ باکس ریزروو رکھے گئے۔
عام انتخابات کے لیے ملک بھر میں 90 ہزار 675 پولنگ اسٹیشنز قائم کیے گئے جن میں سے مردوں کے لیے 25 ہزار 211، خواتین کے لیے 23 ہزار 844 جبکہ مشترکہ 41 ہزار 58 پولنگ اسٹیشن قائم کیے گئے، جبکہ پولنگ کے لیے 2 لاکھ 76 ہزار 398 پولنگ بوتھ قائم کیے گئے۔ عام انتخابات کے دوران 10 لاکھ 3 ہزار 883 پولنگ عملے کو انتخابی عمل کے لیے تربیت دی گئی۔