چیف جسٹس کا زیارت میں قائد اعظم ریزیڈنسی سے ملحقہ ساڑھے31 ہزار فٹ زمین وقف کرنے کا فیصلہ

چیف جسٹس آف پاکستان نے آزادی کے 77مکمل ہونے پر بلوچستان حکومت کو زمین کا تحفہ دیدیا۔
چیف سیکریٹری بلوچستان کے توسط سے صوبائی حکومت کو ارسال کردہ خط میں کہا گیا کہ ملک کی آزادی کے 77مکمل ہونے کے موقع پر ہم زیارت میں قائد اعظم ریزیڈنسی سے ملحقہ 31ہزار 680مربع فٹ اپنی ملکیت میں موجود زمین عوامی فائدے کے لیے بطور انوائرمینٹل سینٹر استعمال کے لیے عطیہ کرنے کی خواہش کا اظہار کیا۔
چیف جسٹس نے بذریعہ خط ضلع زیارت میں اپنی 31ہزار 680مربع فٹ زمین حکومت کو وقف کا اعلان کیا۔
خط میں مزید کہا گیا کہ اس سلسلے میں ہم اس کا لائسنس بلا معاوضہ حکومت بلوچستان کو دینے کی خواہش رکھتے ہیں، اس سلسلے میں ہم نے لائسنس کی شرائط و ضوابط سے متعلق دستاویزات کو منسلک کردیا ہے۔
انہوں نے کہا کہ اگر حکومت رضا مندی ظاہر کرتی ہے تو ہم لوگوں کے لیے 14 اگست 2024 کے پرمسرت دن پر اس تحفے کو پیش کرنا چاہتے ہیں۔
موسمیاتی سینٹر کیلئے اراضی دینے کیلئے لکھے خط پر قاضی عظمت عیسی اور چیف جسٹس قاضی فائز عیسی کے دستخط ہیں، خط کی کاپیاں صدر پاکستان، وزیر اعظم پاکستان، حکومت بلوچستان اور وزیر اعلی بلوچستان کو بھی ارسال کردی گئی ہیں۔