وزیراعظم سے صادق سنجرانی کی ملاقات، بلوچستان کے منصوبوں پر تبادلہ خیال

اسلام آباد: وزیراعظم محمد شہباز شریف سے سابق چیئرمین سینیٹ اور رکن بلوچستان اسمبلی صادق سنجرانی نے ملاقات کی، ملاقات میں صوبہ بلوچستان سے متعلق مختلف امور پر بات چیت کی گئی۔
وزیر اعظم شہباز شریف نے کہا کہ بلوچستان کے عوام کی ترقی و خوشحالی حکومت کی اولین ترجیحات میں شامل ہے، بلوچستان کے معدنی ذخائر سے بھرپور استفادہ حاصل کرنے کے حوالے سے چاغی منرل راہداری کا قیام عمل میں لایا جا رہا ہے۔
شہباز شریف نے کہا کہ چاغی منرل راہداری میں کئی منصوبے زیرِ غور ہیں، چاغی اور گرد و نواح کے علاقوں کے معدنی ذخائر کی گوادر بندرگاہ تک رسائی ممکن بنانے کے لئے چاغی سے گوادر تک ریلوے لائن تعمیر کی جائے گی۔
وزیراعظم کا کہنا تھا کہ چاغی میں بجلی سپلائی کا نظام بہتر بنانے کے حوالے سے گرڈ سٹیشن قائم کیا جا رہا ہے جبکہ علاقے میں پانی کی بلا تعطل فراہمی کے حوالے سے بھی اقدامات کئے جا رہے ہیں۔
سابق چیئرمین سینیٹ نے بلوچستان کی ترقی و خوشحالی میں خصوصی دلچسپی لینے اور اس حوالے سے عملی اقدامات پر وزیراعظم کا شکریہ ادا کیا۔
صادق سنجرانی نے وزیراعظم شہباز شریف کو نوکنڈی شہر کی ترقی کے حوالے سے نوکنڈی ماسٹر پلان کی حکمت عملی پر بریفنگ دی۔