وزیراعظم سے امام مسجد نبویۖ کی ملاقات’ معزز مہمان کے اعزاز میں عشائیہ

اسلام آباد: وزیراعظم محمد شہباز شریف سے امام مسجد نبویۖ ڈاکٹر صلاح محمد البدیر کی ملاقات، وزیراعظم نے معزز مہمان کے اعزاز میں عشائیہ دیا۔
وزیراعظم نے امام مسجد نبویۖ سے گفتگو کرتے ہوئے کہا کہ آپ کا دورہ پاکستان کے لیے باعث اعزاز ہے، آپ کے دورے سے دونوں ممالک کے درمیان تعلقات مزید بہتر ہوں گے۔
امام مسجد نبویۖنے وزیراعظم کو خادم الحرمین الشریفین شاہ سلمان بن عبدالعزیز آل سعود اور دیگر سعودی قیادت کی نیک خواہشات کا پیغام پہنچایا۔
وزیراعظم نے خادم الحرمین الشریفین شاہ سلمان بن عبدالعزیز آل سعود اور سعودی ولی عہد شہزادہ محمد بن سلمان کے لیے نیک خواہشات کا اظہار کرتے ہوئے کہا کہ پاکستان کے عوام کے دلوں میں خادم الحرمین الشریفین اور سعودی قیادت کے لیے بے انتہا عزت و احترام ہے۔
انہوں نے مزید کہا کہ پاکستان اور سعودی عرب کے تعلقات لازوال ہیں، سعودی عرب نے ہر مشکل گھڑی میں پاکستان کا ساتھ دیا ہے، ہمارا سعودی عرب سے رشتہ دہائیوں پر محیط ہے اور دونوں ممالک کے تعلقات نئی بلندیوں کی جانب پر گامزن ہیں۔
امام مسجد نبویۖ نے پاکستان میں پر تپاک میزبانی پر وزیراعظم کا تہہ دل سے شکریہ ادا کیا اور کہا کہ پاکستان اور سعودی عرب دو ایسے ستارے ہیں جو کبھی ایک دوسرے سے جدا نہیں ہو سکتے۔
ملاقات میں وفاقی وزیر قانون اعظم نذیر تارڑ ، وفاقی وزیر مذہبی امور چوہدری سالک حسین، علمائے کرام ، پاکستان میں تعینات سعودی سفیر نواف بن سعید سعودی اور دیگر سعودی حکام شامل تھے۔
ملاقات کے بعد وزیراعظم کی طرف سے امام مسجد نبویۖاور ان کے وفد کے اعزاز میں عشائیہ دیا۔