اڈیالہ جیل کی انتظامیہ عدالتی احکامات ردی کی ٹوکری میں پھینک دیتی ہے: شیخ وقاص اکرم

ترجمان تحریک انصاف شیخ وقاص اکرم نے کہا کہ اڈیالہ جیل کی انتظامیہ عدالتی احکامات ردی کی ٹوکری میں پھینک دیتی ہے، چیف جسٹس صاحب نوٹس لیں، عدالتوں کا مذاق اڑایا جارہا ہے۔نیوز کانفرنس کرتے ہوئے شیخ وقاص اکرم نے کہا کہ چیف جسٹس صاحب عدالتی فیصلوں پر عملدرآمد کرائیں، ڈاکٹر یاسمین راشد کیساتھ نوازشریف کو شکست دینے پر ناروا سلوک کیا جا رہا ہے، ڈاکٹر یاسمین راشد کو علاج کی سہولیات نہیں دی جا رہیں۔شیخ وقاص اکرم کا کہنا تھا کہ شاہ محمود قریشی، ڈاکٹر یاسمین راشد، عمر چیمہ کے ساتھ ظلم ہو رہا ہے، چیف الیکشن کمشنر کیسے جمشید دستی کو نااہل قرار دے سکتے ہیں، الیکشن کمیشن اپوزیشن لیڈر کو راستے سے ہٹانا چاہتے ہیں۔تحریک انصاف کے رہنما نے کہا کہ ہماری لیگل ٹیم جمشید دستی کے معاملے کو دیکھ رہی ہے۔انہوں نے کہا کہ گزشتہ 15 ماہ میں پٹرول کی قیمت میں 82 فیصد اضافہ ہوا ہے، خوشحالی لانے کا نعرہ لگانے والوں نے غریب کو تباہ کر دیا ہے، چینی 200 روپے کلو تک پہنچ گئی ہے، حکومت نے پہلے چینی برآمد کرنے کی اجازت دی۔شیخ وقاص اکرم نے کہا کہ چینی مافیا نے پہلےمارکیٹ میں چینی کی قلت پیدا کی، عوام کی جیب پر 60 روپے فی کلو کا ڈاکہ مار رہےہیں، خاص مافیا کو فائدہ پہنچانے کے لیے عوام کو لوٹا جا رہا ہے۔انہوں نے کہا کہ تحریک انصاف کی حکومت میں 150 روپے پٹرول تھا جو آج 272 روپے ہو چکا ہے، تحریک انصاف کی حکومت میں چینی 86 اور آج 200 روپے فی کلو ہو چکی ہے، آج ہر چیز کی قیمت دگنا ہو چکی ہے۔شیخ وقاص اکرم نے کہا کہ مڈل کلاس طبقہ کا جینا مشکل ہو چکا ہے، 5 اگست کے حوالے سے کوئی ابہام نہیں ہے، بانی پی ٹی آئی نے پانچ اگست کی تاریخ دی ہے۔