نواز شریف کی انتخابی کامیابی کے خلاف درخواستیں مسترد,الیکشن کمیشن سے رجوع کرنے کی ہدایت

لاہور ہائیکورٹ نے نواز شریف، حمزہ شہباز سمیت متعدد امیدواروں کی کامیابی کے خلاف درخواستیں مسترد کرتے ہوئے درخواست گزاروں کو الیکشن کمیشن سے رجوع کرنے کی ہدایت کر دی۔
پی پی 191 کے ووٹوں کی گنتی کے لیے امیدوار سلیم صادق کی درخواست پر ہائیکورٹ میں سماعت ہوئی، عدالت نے سلیم صادق کو الیکشن کمیشن سے رجوع کرنے کی ہدایت کرتے ہوئے درخواست نمٹا دی۔
ہائیکورٹ میں نواز شریف کی کامیابی کے خلاف این اے 130 سے امیدوار اشتیاق چوہدری کی درخواست پر سماعت ہوئی۔ عدالت نے درخواست گزار کو ریٹرننگ آفیسر آر او سے رجوع کرنے کی ہدایت کی۔
ہائی کورٹ نے حمزہ شہباز کی صوبائی اسمبلی کی نشست پر کامیابی کے خلاف درخواست بھی خارج کرتے ہوئے درخواست گزار محمد خان مدنی کو الیکشن کمیشن سے رجوع کرنے کی ہدایت کی۔
جسٹس علی باقر نجفی نے حلقہ این اے 77 میں دوبارہ گنتی کے لیے امیدوار راشدہ طارق کی درخواست پر سماعت کی۔ عدالت نے درخواست خارج کرتے ہوئے الیکشن کمیشن سے رجوع کرنے کی ہدایت کردی۔
عدالت نے قرار دیا کہ تمام انتخابی معاملات کا پہلا فورم الیکشن کمیشن ہے، درخواست گزار الیکشن کمیشن سے رجوع کرے۔